Йошкар-Олалан 440 ий теммым пайремлаш ямдылалтме шотышто совещанийым эртен
Марий Элым вуйлатыше Йошкар-Олалан 440 ий теммым пайремлаш ямдылалтме шотышто совещанийым эртарен. Правительстве председательын алмаштышыже- тӱвыра министр Константин Иванов палемден: ямдылалтме шотышто организаций комитетым ыштыме, мероприятий планым ямдылыме. 30-шо январь гыч 4-ше февраль марте ВДНХ-ште «Россий» Тӱнямбал выставке форумышто Йошкар-Олан арняже лиеш. Тений майыште «Кыдал Юлысо ола- влак: историй да кызытсе жап» регион- влак кокласе кӱкшытан нылымше шанче-практик конференций лиеш, а олан лӱмгечыжлан «Йошкар-Олан историйже» тӱшкан ямдылыме монографий савыкталт лекшаш. Тӱҥ пайрем мероприятий- влак 6-шо гыч 11-ше август марте эртат. Тӱрлӧ мероприятийым эртараш 30 утла площадке ямдылалтеш. Шар дене чоҥештылше- влакын фестивальышт, «Марий калыкын легендыже» пу гыч пӱчкедымаш, Изи Какшаныште «Йошкин КАП» вейкбординг дене таҥасымаш, «Йошка еш» гастроном фестиваль, ретро-автомобиль- влакын фестивальышт да молат лийшаш улыт. Константин Ивановын мутшо почеш ола администраций кугу пашам шуктен шога. Тидын годымак олан историй ужашыжым тӱзландараш ешартыш оксам ойыраш кӱлеш манын. Евгений Маслов каласкален: олан кечыже ятыр площадкыште эрта. Кугу мероприятийыш республике да моло кундемла гыч уна- влакым ӱжаш палемдыме. Марий Элым вуйлатыше Юрий Зайцевын мутшо почеш пайрем шӱлышым олаште илыше кажне еҥ шижшаш.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
