«Йошкар-Оласе аэровокзал пужен ышталтшаш гына огыл, а у аэровокзал комплексым чоҥыман»…
Марий Элыште паша визит дене Росавиацийым вуйлатыше Александр Нерадько лийын. Эн ончыч тудо Йошкар-Оласе аэропортын пашаж дене палыме лийын, вара правительстве пӧртыштӧ республикым вуйлатыше Александр Евстифеев дене вашлийын да авиаций комплексым вияҥдыме йодышым каҥашеныт. Совещанийыште Марий Эл деч сенатор Константин Косачёв, Мордовийын, Марий Элын, Чувашийын, Пенза областьын кугыжаныш погыжым виктарыше федерал агентствын регион кокласе виктемжым вуйлатышын сомылжым шуктышо Ирина Ванина да молат лийыныт. Евстифеев палемден: юж кыл шотышто ойлаш гын, чоҥештылме географийым кумдаҥдаш кӱлеш. Планыште- Санкт-Петербург, Сочи да Симферополь. Тӱҥ проблемыже- чоҥештен кӱзымӧ да волен шичме полосан тоштеммыже. Тудо федерал погылан шотлалтеш. Президент палемден ыле: кызыт ик регион гыч весыш логалашлан Моско гоч чоҥешташ кӱлеш. Сандене субъектлаште маршрут сетьым ямдылаш кӱлеш. Александр Нерадько палемден: Йошкар-Оласе аэропорт комплексым вияҥдыме паша план-график почеш шукталтеш. Кызыт «Йошкар-Ола» аэропртым 2024-ше ий марте магистраль инфраструктурым кумдаҥдымашым уэмдыме комплексный планыш пурташ ямдылалтме паша кая. Ончлгоч шотлымо почеш, аэропорт комплексым вияҥдыме пашалан 6 миллиард теҥге окса кӱлеш. Тушечын кум миллиардше аэродром комплекслан кайышаш. Тиддеч посна чоҥештылме лӱдыкшыдымылыкым ыштыме шотышто пашам тӱналме. Самолётым шындаш чаткан пурымо системым да светосигнал оборудованийым верандаш кӱлеш. Тидымат ешарен: Йошкар-Оласе аэровокзал пужен ышталтшаш гына огыл, а у аэровокзал комплексым чоҥыман. Вашлиймаште чыла шуктышаш пашам радамын каҥашыме.
