Кок кундем гыч колызо- влак таҥасеныт

Кок кундем гыч колызо- влак таҥасеныт
          Ий ӱмбачын блесна дене колым кучымо шотышто Марий Элын кубокшо кок кундем гыч колызо- влакым чумырен. Эртыше каныш кечылаште тыгай таҥасымаш Юл эҥерыште Килемар районысо Дубовский посёлко воктене эртен. Таҥасымашке Йошкар-Ола, Козьмодемьянск, Чебоксар да Новочебоксарск гыч лу команде ушнен. Йӱштӧ да мардежым ончыде 30 колызо шукырак олаҥгым кучаш тыршен. Команде- влак коклаште Йошкар-Ола гыч «Рыбий Жор» команде сеҥышыш лектын. Кокымшо верым Чебоксар гыч «Авантюра» налын. Кумшо вер дене Козьмодемьянск ден Чебоксар гыч колызо- влакым ушышо «Тройка» команде палемдалтын. Личный зачётышто кубокым Чебоксар гыч Эдурад Карпов сеҥен налын. Тудо вич килограммат 899 грамм колым кучен. Кокымшо вер Йошкар-Ола гыч Андрей Костеринлан логалын- колжо вич килоат 407 граммыш шуын, Кумшо верыш Козьмодемьянск гыч Юрий Кондаков лектын. Колжо вич килограммат 239 граммыш шупшылын.
        Фото: Марий Элысе кол кучымо федераций.

Прошлые выпуски