Козьмодемьянскыште туризм йодышым кумдан каҥашыме
Козьмодемьянскысе Александр Григорьев лӱмеш художественно- исторический тоштерыште правительствын ӧрдыжтӧ эртарыме заседанийыштыже республикын инфраструктурыжым, транспортым системым, турист да тӱвыра куатым вияҥдыме йодышым каҥашыме. Погынышо- влакым саламлышыла, республикым вуйлатыше каласен: тыгай йӧн дене вашлиймаш республикын да тоштерын 100 ияш лӱмгечыштым палемдыме кышкарыште туризмым вияҥдыме йодышым каҥашаш пеш сай йӧн. Козьмодемьянскын ойыртемже тушто- тудын историй ужышыжым кава йымалсе ик кугу тоштер манаш лиеш. Пытартыш жапыште ола тӱзлана. Республикын лӱмгечыже вашеш олаште книгагудын верланыме купеч пӧртым, калык училищын пӧртшым, стрелецкий часамлам олмыкташ палемдыме. Марий Элыш турист- влак утларак да утларак толыт. Икымше пелийыште гына 425 тӱжем еҥ толын каен. Эше шукыракат лийын кертеш. Тыште полыш сфера ден унагудо озанлык чак пашам ыштышаш улыт. Тӱҥжӧ: турист- влак кайымышт годым, канаш чыла йӧн уло манын, куанен кайышт. Александр Евстифеев посна йодыш семын Козьмодемьянскыште порт пашам ойырен. Ятыр турист Юл эҥер мучко коштеш. Кодшо ийын ола воктене 193 судно чарнен. Тидыже ончычсо ий деч 70 процентлан шукырак. Вуйлатыше тыгак Сеҥымашлан 75 ий теммылан ямдылалтме йодышлан тӱткышым ойыраш, туризм пашаш волонтёр- влакым ушаш кӱштен. Икымше апрельлан унагудо комплексым вияҥдыме программым ышташ темлен. Юл эҥерыште паром-пассажир причал- влакым чоҥымо йодышым каҥашаш кӱлеш манын. Тыгак моло йодыш- влакымат лончылымо. Кугу лӱмгече дене пайдаланен, Александр Евстифеев тоштерын вуйлатышыжлан у автобусым налаш сертификатым кучыктен. Тыгак тоштерын икмыняр пашаеҥже республикын сулло пашаеҥже чап лӱмым, Правительствын Чап кагазшым, Главан тауштымашыжым налын.
