Лӱмлӧ кум тумым шындыме

              Марий Элыште Петр Первыйын кум тумыжым шындыме. Пугачёвын палыме тумыжо республикыштына историй дене кылдалтше ик пушеҥге гына огыл. Ынде тудын эше кум «шольыжо» ешаралтын. «Пётр Великийын Российысе тумерже» императорын 350 ияш лӱмгечыжлан пӧлеклалтше акций мемнан кундемышкат толын шуын. Лӱмгечыже шушаш ийын палемдалташ тӱҥалеш. Пушеҥге озымым Йошкар-Олашке Руш тоштерын генеральный директоржо Владимир Гусев конден. Ушештарена: Санкт-Петербург гыч делегаций Руш тоштерын Тӱвыра да ончер рӱдержым почаш толын. «Тумер» программе 2019-ше ий годсек ышта. Шыже еда Кеҥеж садыште Пётр Первый жапысе тумын тумлегыжым погат. Тудым кӧршӧкыштӧ нерештарат да кум ияш лиймеш куштат, вара у верыш луктын шындат. Шындыме вер интерактивный картыште палемдалтеш да тӱшка реестрыш пурталтеш. Российысе да Европысо олалаште чылаже 200 утла Петрын тумыжым шындыме. Лӱмгече вашеш тиде чотым 350-шке шукташ шонат. 250-ше пушеҥгым Йошкар-Оласе тӱвыра да каныме паркыште радиаций катастрофо ден аварийыште ӱмыр лугыч лийше- влаклан мемориал воктене торжественно шындыме. Тушто Владимир Гусев, тӱвыра министр Константин Иванов, Руш тоштерын да Тӱс сымыктыш тоштерын пашаеҥышт участвоватленыт. Тыгаяк лӱмлӧ пушеҥгым икте гыч Козьмодемьянскыште «Пугачёв корнышто» да Юриныште Шереметев замкын садыштыже шындыме.
             Калыкле сурет галерейын фотожо.

Прошлые выпуски