Марий Элыште сентябрь гыч туныктышо- влаклан окладым 15 процентлан кӱзыктат

Марий Элыште сентябрь гыч туныктышо- влаклан окладым 15 процентлан кӱзыктат
            Марий Элыште сентябрь гыч туныктышо- влаклан окладым 15 процентлан кӱзыктат. Тидын нерген Марий Элым вуйлатыше Юрий Зайцев туныктышо- влакын августысо форумыштым почмо годым увертарен. Тений форумышто Марий Элысе туныктымо пашаште тыршыше- влак деч посна Запорожье гыч педагог- влак участвоватленыт. Марий Элым вуйлатыше форумын лӱмжын символ шотан улмыжым палемден: «Йӱлам аралышыла, ончыкылыкым ыштена». Ме шке ончыкылыкнам пеҥгыде негызеш чоҥышаш улына. Тыгай негызше- шочмо элым йӧратымаш, чолга граждан позиций, Российын историй да тӱвыра поянлыкше улыт, каласен тудо. Юрий Зайцев туныктымо пашаште сеҥымаш- влак нерген ойлен. 22 школышто «Точка роста» рӱдер почылтеш, «Кванториум» йоча технопарк, талантан йоча- влакым рашемдыме да нунылан полшымо «Волгенче» рӱдер пашаштым тӱҥалыт. Тиддеч посна ныл школ чоҥалтеш, тений 10 муниципал образованийыште 13 школым капитально олмыктымо. Мероприятий- влакым илышыш шыҥдараш 850 миллион теҥгем колтымо, республике ешартыш 9 миллион теҥгем ойырен. Правительстве тыгак колледж ден техникумлан леведышыштым олмыкташ 39 миллион теҥгем колтен. Тыгак самырык- влакын чулымлыкыштым палемдыме. Нуно шке кумылын военнослужащий- влаклан полшымо акцийыш ушнат, посылкым погат, шокшо вургемым ургат, маскировка сеть- влакым пидыт. Президент Владимир Путин 2023-шо ийым туныктышын да наставникын идалыкышт семын увертарен. Икымше сентябрь гыч ме туныктышо- влакын окладыштым 15 процентлан кугемдена. Мый тыге шотлем: мемнан регионысо туныктыш системын пӱтынь командыжын сай лектышыже коеш. Тыгак тудо Запорожьесе туныктышо- влакым посна саламлен. Мучашлан ойыртемалтше- влаклан наградым кучыктен. Морко районысо Кокласола лицейыште историйым туныктышо Валентина Васильева, Моркысо кокымшо школын руш йылме ден сылнымутым туныктышыжо Эльза Семёнова «Марий Элын калык туныктышыжо» лийыныт. Индеш еҥлан Республикым вуйлатышын тауштымашыжым увертарыме.
             Фото: Марий Элым вуйлатышын  администрацийжын увер дене пашам ыштыше пӧлкаже.

Прошлые выпуски