Марий самырык театр Моско ден Санкт-Петербургышто марий йылме дене «школ классикым» ончыктен
Марий самырык театр Моско ден Санкт-Петербургышто марий йылме дене «школ классикым» ончыктен. «Школ классике» Тӱнямбал театр фестиваль кышкарыште Марий ТЮЗ ноябрь ден декабрьыште гастроль дене Москош да Санкт-Петербургыш миен. Тиде фестивальыш тудо кумшо гана ушнен. 13-шо ноябрьыште Москосо тунемше- влаклан Иван Гончаровын «Обломов. Кызыт але нигунамат» спектакльым кок гана ончыктен. Морозовмытын илемыштышт марий концертым шынденыт. Тиде фестиваль кышкарыштак 5-ше да 6-шо декабрьыште Самырык театр Санкт-Петербургышто тиде спектакльым да эше Фонвизинын «Недоросль», Морис Метерлинкын «Канде кайык» спектакльыштым калык ончыко луктын. Чыла спектакльжымат ончаш калык шыҥ-шыҥ погынен да совым рӱж кырен вашлийын.
