Марий- влак Акпатыр ден Полтышлан вуйым савеныт

           Марий- влак Акпатыр ден Полтышлан вуйым савеныт. Эртыше шуматкечын Киров кундемысе Малмыж районышто марий юмын йӱлан шнуй-геройжо- влак лӱмеш юмылтымаш эртен. Регион- влак кӱкшытан Шнуй Акпатырын кечыже Кугу Кетек ялыште лийын. Пайремлан икмыняр кече ончычак ямдылалташ тӱҥалыт: калык вургемым, сийым, пӧлекым ямдылат. Кугу Кетек калык уна- влакым кинде-шинчал дене вашлийын. А нуныжо пӧлекым кучыктеныт. Акпатыр лӱмеш кумалмаш тудлан шогалтыме мемориал кӱ воктене эртен. Тушто Марий Эл, Татарстан, Удмуртий, Киров область гыч онаеҥ- влак участвоватленыт.
             Тиде кечынак изиш шагалрак еҥ дене марий герой Полтышлан тудын лӱмжым нумалше курыкышто вуйым савыме. Тудо Кугу Кетек деч 30 меҥге тораште Малмыж ола воктене верланен. Тушто шарныктыше гранит кӱм вераҥдыме, ончымо площадкым ыштыме, кок меҥгыште марий, руш, татар да одо йылме дене «Пелед, тӱзлане шочмо кундем» манын возымо. Полтыш курыкыш 40 наре еҥ погынен. Вес ийын шарнымашым июльышто эртараш кутырен келшыме.

Прошлые выпуски