Йошкар-Ола кок кече шочмо кечыжым пайремлыш

             Шуматкечын да рушарнян Йошкар-Ола шкенжын 438-ше шочмо кечыжым кумдан пайремлыш. Тиддеч ончыч Эрик Сапаев лӱмеш опера да балет кугыжаныш академический театрыште торжественный мероприятий эртыш. Тушко туныктышо, врач, чоҥышо, бизнесын да мер организацийлан еҥышт чумыргеныт. Тушто Марий Элым вуйлатышын пашажым шуктышо Юрий Зайцев участвоватлен. Тудо мероприятийыш погынышо- влакын олам вияҥдымашке пыштыме надырыштым палемден. Нунылан сулен налме наградыштым кучыктымо.
            «Марий Элын суло врачше» чап лӱмым Йошкар-Ола эмлыме верын неврлог- врачше Александр Бородин, «Марий Элын сулло машиностроительже» Чап лӱмым Марий машиностроитель заводын производствым виктарымашым вуйлатышын алмаштышыже Евгений Широков налыныт. «Марий Элысе тӱвыран сулло пашаеҥже» лӱмым 7-ше йоча сымыктыш школын туныктышыжо Илона Рыжинскаялан пуымо. «Республикысе туныктышын сулло пашаенже» лӱм дене Торгово-технологий колледжын социал педагогшо Татьяна Ведерникова ден мдицина колледжын туныктымо ужашыжым вуйлаште Ирина Веселова палемдалтыныт. «Мостремстрой» предприятийын мастерже Сергей Цветков «Марий Элын сулло чоҥышыжо» лийын. Тыгак Колумб лӱмеш книгагудым вуйлатышын алмаштышыже Ирина Комиссарова, мемнан «Марий Эл» ГТРК-ан тематик программыжын шеф-редакторжо Илья Королёв, потребительын праважым аралыме шотышто федерал надзор службо виктемын специалист-экспертше Лариса Шубина Правительствын Чап грамотыжо дене палемдалтыныт.
             Вес кечынже, 6-шо августышто, Юрий Зайцев Олан кечыже лӱмеш эртарыме пайрем мероприятийлаште лийын да оласе калыкым пайрем дене саламлен. Тиде- шӱмышт да чонышт дене Йошкар-Ола дене улшо, рӱдӧ ола верч илыше- влакын пайремышт. Оласе калык- тиде ик команде, а мый тиде командын еҥже улам,- каласен тудо. Оласе калыкым да уна- влакым Федераций Советым вуйлатышын алмаштышыже, Марий Эл деч сенатор Константин Косачёват саламлен. Пайрем мероприятий- влак оласе 20 площадкыште эртеныт. Кажныже шкаланже келшышыжым ойырен налын кертын. Пайрем кас мотор тулсавыш дене мучашлалтын.
             Фото: Марий Элым вуйлатышын организаций да аналитик виктемже.

Прошлые выпуски