Юрино районышто кияр фестиваль лиеш
Регион- влак кокласе кӱкшытан «Васильевысе кияр» фестиваль лиеш. 14-ше августышто Васильево селан кечыжым палемдыме кышкарыште Кияр фольклор фестивальым эртарат. Тудым Юрино район администрацийын тӱвыра пӧлкаже, районысо социокультурный комплекс, ял илем администраций да Марий Элыште Российысе ӱдырамаш- влакын ушемышт полшымо дене пайремлат. Фестивальын унаже семын Истобенысе кияр мероприятийым ямдылыше, Киров областьысе верласе самоуправлений орган- влакын еҥышт, Киров областьысе ӱдырамаш- влакын ушемышт лийшаш улыт. Икымше гана тений киярын «шодырт» йӱкшылан Чемпионат лиеш. Васильевский села республикысе Киярын рӱдыверже лӱм верч кучедалеш. Селаште усталык коллектив- влакын гармонь, муро, такмак ден таҥошкылмашышт лиеш, районысо тӱвыра пӧрт- влакын коллективышт пайрем шӱлышым пуртат. Тӱрлӧ конкурс ден таҥасымашым, кияр дене кылдлатше лудыш мурым мурен ӱчашымашым эртарат. Туштак киярым шинчалтен да тамлен ончаш лиеш. Васильевка гыч храм марте экскурсий, кияр да моло кочкыш гыч сийым ямдылат.
