Мер контроль школыш ушнаш йодмашым налыт
Икымше гыч 30-шо октябрь марте кокымшо Мер контроль школыш ушнаш йодмашым налыт. Кӧ граждан сферыште вашталтышым ыштынеже, кучем орган дене пайдале вашмутланымашым эртарынеже, тиде школ сай полыш лийын кертеш. Тушто айдемын праваже нерген, мер контрольын мом ыштымыжым пален налыда. Школышто пӱсӧ вашмутланымаш, опыт дене палдарымаш, практик занятий- влак эртат. Нуным Йошкар-Ола, Пермь, Моско, Воронеж да моло олала гыч правам аралыше, юрист, мер пашаеҥ- влак эртарат. Курс 8 семинар гыч шога, кажныже 6 шагат шуйна. Семинар-влак арняш кок гана лийыт, курс пӱтынек вич тылзе шуйна. Школым «Айдеме да закон» правам аралыше организаций эртара. Школышто тунеммылан оксам тӱлыман огыл. Районла гыч ушнышо- влаклан семинарыш кошташ корнылан оксам ойырат. Икымше занятий ноябрь мучашыште лиеш.
