Республикым вуйлатыше Курык марий районысо кӱлешан социал объект- влакым ончен
Республикым вуйлатыше Александр Евстифеев Курык марий районыш паша дене мийымыж годым республикысе ик эн тошто тунемме верыш Пайскырык школыш миен. У тунемме ий вашеш тушто спортзалым пӱтынек олмыктымо. Тиддеч посна вургемым вашталтен чийыме верым, душевойым тӧрлымӧ, спорт ӱзгарым налме. Тений республике мучко 9 спортзалым олмыктымо. Тидлан 19 миллион теҥгем ойырымо ыле. Паша лектышым аклаш республикым вуйлатыше шке миен. Туныктышо- влакын профессионализмыштым палемден. Пытартыш ийлаште ятыр ӱдыр-рвезе школым медаль дене тунем пытарен. Тунемме верым 1861-шо ийыште чоҥымо. Тудо годсек вияҥ толшо йӱлам арален кодыман, манын. Тыгак школын духовой оркестржым кӱкшын аклен. Республикым вуйлатыше тиддеч вара Кожваж ялыш миен. Тушто «Сеҥымашлан 70 ий темме лӱмеш паркым» ончен да верысе калык дене вашлийын. Мемориал объектым верысе калыкын вийже дене 2015-ше ийыште чоҥымо. Тӱҥалтышым пенсионер Леонид Иванов ыштен. Республикым вуйлатыше тудлан тауштымашым кучыктен да ешарен: паркым умбакыже тӱзландарыме йодышым район администрацийыште каҥашыме лиеш.
