Республикысе чыла книгагудылан книгам пӧлеклыме акций
Республикысе чыла книгагудылан книгам пӧлеклыме акций. Тӱвыра министерствын полшымыжо дене Сергей Чавайн лӱмеш книгагудо «Йӧратыме книгагудылан у книгам пӧлекле» республике кӱкшытан акцийым увертара. Тудо 1-ше гыч 14-ше февраль марте эртаралтеш. Тушко лудаш йӧратыше, сай книгам аклыше, шке книгагудыжым пагалыше, книгагудо- влаклан пеледмашым тыланыше кажне еҥым ушнаш ӱжыт. А книгагудыш коштдымо- влаклан тушко шерге пӧлек дене мияш сай амал лиеш. Книга у лийшаш, мыняр шонеда тунар книгам намияш лиеш, яра пуыман, пӧлеклыме книгам вашталташ да пӧртылташ ок лий. Акцийыште республикысе чыла книгагудо участвоватла. Пӧлеклыше- влакын кумылышт уло гын, книга кӧргеш шке лӱмнерыштым але органиазцийыштым ончыктен кертыт. А книган авторжо пӧлекла гын, пӧлек нерген возен коден кертеш. Тидыже лудшо да ончыкылык тукымлан книган акшым эшеат кугемда. Акцийым 14-ше февральыште- Книгам пӧлеклыме тӱнямбал кечын иктешлат. Эн чолга участник- влак Книгагудо деч тауштымашан серышым налыт да «Книгагудылан книгам пӧлеклыше- влакын» книгашкыже пурталтыт.
Фото: Тӱвыра министерстве.
Фото: Тӱвыра министерстве.
