Республикыштына коронавирус инфекций ваштареш 18 тӱжем еҥлан вакцинацийым ыштыме

                          Республикыштына 15-ше мартлан шотлымаште коронавирус инфекций ваштареш 18 тӱжем еҥлан вакцинацийым ыштыме. Тидыже кондымо вакцинын 85 процентше лиеш. 11 тӱжемат 600 еҥже тичмаш курсым эртен. Тидын нерген оперативный штабын заседанийыштыше тазалыкралтыш министр Марина Панькова увертарен. Республикышкына чылаже 21 тӱжемат 792 дозо Гам-КОВИД-Вак вакциным кондымо. Вакцинацийым ыштыме 110 пунктым ямдылыме, мобильный пунктым 50 марте ешарыме. Кӱлеш оборудованийым, материалым чыла верыштыжат ситарыме. Эпидемиологий ситуаций саемаш тӱҥалмылан кӧра лу медицина организацийыште 900 утла койкым кораҥдыме, кум медицина тӧнеж ончычсо паша режимышкыже пӱтынек пӧртылын. Кызыт 7 медорганизацийыште 585 койко кодын. Тушто 396 еҥ эмлалтеш. Яра койкыжо 32 процентыш шуэш. Министр Марина Панькован мутшо почеш, пытартыш кок тылзе жапыште эмлалтше кугурак ийготан пациент- влакын осложненийышт рашемдалтеш. Тиде- шӱм чер, неле тромбоз. Эмлыме вер гыч лекше самырык- влак умбакыже эмлалташ темлымашым огыт шукто. 16-ше мартлан шотлымаште республикыштына 12 тӱжемат 173 еҥын тиде диагнозшым пеҥгыдемден ончыктымо.

Прошлые выпуски