Театр конкурслаште сеҥыше- влак «Артекыш» каят
Йошкар-Олаште театрлан пӧлеклалтше Россий кӱкшытан кок йоча конкурсын регионысо йыжыҥжым иктешленыт. Конкурсын йодмашыже почеш йоча- влак палемдыме теме почеш сӱретым ыштышаш але рецензийым возышаш улыт ыле. Ойырен налмаш 19-ше апрель гыч 18-ше август марте шуйнен. Кажне конкурс гыч жюри ик сеҥышым ойырен налын. Регионысо йыжыҥыште эн сай сӱретлан Морко районысо сымыктыш школ гыч Элина Абросимован «Щелкунчик» балет гыч фрагментым сӱретлымыжым шотлымо. «Театр нерген возена» конкурсышто республикыштына сеҥышыш Йошкар-Оласе 9-ше номеран школ гыч Диана Гельванова лектын. Тудо Киров кугыжаныш самырык театрын шындыме «Театр на Спасской» спектакльжылан рецензийым возен. Усталык конкурслаште тӱҥ призше «Артек» Тӱнямбал йоча лагерьыш путёвко лийын. Ӱдыр- влак моло кундемла гыч сеҥыше- влак дене пырля Театр идалыклан пӧлеклалтше сменыште каналтат. Тудо 23-шо сентябрь гыч 14-ше октябрь марте шуйна.
