Йошкар-Олан эше ик визит карточкыжо лиеш
Йошкар-Олан эше ик визит карточкыжо лиеш- Марий парк. Оласе у кумдык Тазалык аллей пелен ышталтеш да калыкле стиль дене сӧрастаралтеш. Марий парк проект «Йӧнан оласе кумдыкым ыштымаш» федерал программе кышкарыште рейтинг йӱклымаште эн шуко- ныл тӱжем утла йӱкым поген ыле. Паркым ыштышаш верым Юрий Зайцев ончен лектын. Правительстве вуйлатышын икмыше алмаштышыже Михаил Васютин палемден: Марий парк регионлан кӱлешан объект. Тудо марий илыш дене кылдалтеш. Тушто каныме парк, куштымо площадке, усталык площадке- влак лийыт. Рӱдӧ аллейыште 16 муниципалитетлан кугу площадке- влак ойыралтыт. Кугу пайрем годым кажныже шкенжым ончыктен кертеш. Кажне район нерген увер, карте вераҥдалтеш. Тыге толшо еҥ уло республике дене палыме лийын кертеш. Кызыт проект паша мучашлалтеш, вара подряд организаций ойыралтеш. Проектын акше 70 наре миллионыш шуэш. Тудо кок йыжыҥ дене чоҥалтеш. Эн ончыч концерт ден кинофильмлан сцена, йӧнан теҥгыл ышталтеш, тыгак йоча площадке, беседке, уна пӧрт лийшаш улыт. Юрий зайцевын мутшо почеш тудо олан гына огыл, республикын визит карточкыжо лийын кертеш.
Фото: Марий Элым вуйлатышын организаций да аналитик виктемже.
Фото: Марий Элым вуйлатышын организаций да аналитик виктемже.
