Идалык мучаш марте шӱк-куштырам погаш 450 у контейнерым налме лиеш

            Республикыштына идалык мучаш марте шӱк-куштырам погаш 450 у контейнерым налме лиеш. Марий Элым вуйлатышын пашажым шуктышо Юрий Зайцев Юл кундем округышто пеҥгыде шӱк-куштыра дене пашам ыштымаште реформым шыҥдарыме йодыш дене совещанийыште участвоватлен. Тудым Россий Правительстве председательын алмаштышыже Виктория Абрамченко ден полномочный представитель Игорь Комаров эртареныт. Совещаний видеоконференций йӧн дене эртен. Вице-премьер палемден: 2030-шо ий марте 100 процент отходым ойыркалаш да шӱк-куштырам тойымашым кок пачаш шагалемдаш Российын Президентше кӱштен. Тидлан тыршаш кӱлеш. Округ переработкылан сай куатым ыштыше кундем радамыш пура. Тидымат ешарен: тений 14 субъект гыч 8-ыже ойыркален погаш контейнерым налаш 360 миллион теҥге федерал полышым налыт.
            Марий Элыште пашам саемдыме шотышто сомыл умбакыже шуйна. Кок зонышто операторла «Благоустройство» ушем пашам ышта. Тудын полышыжо дене 19-ше ийыште 63 процент калык пайдаланен гын, кызыт 94 процентым эртен. Реформо тӱҥалме годсе контейнер парк 12 тӱжем гыч 16 тӱжемыш шуын. Калыкле проектын цельышкыже шуаш республикыште шӱк-куштырам ойыркалыше ныл комплексым Йошкар-Олаште, Волжскышто, Шернурышто да Курык марий районысо Кадышево ялыште чоҥаш палемдыме, Кучки посёлко воктене полигоным пужен ыштышаш улыт. Нине мероприятийым 2028-ше ий марте ыштен шукташ кӱлеш.
             Фото: Марий Элым вуйлатышын организаций да аналитик виктемже.

Прошлые выпуски