Кугурак ийготан- влак профессионал мастарлык дене таҥасат
Кудымшо октябрьыште республикыштына 50 ияш да кугурак ийготан- влаклан «Навыки мудрых» Ворлдскилс стандарт дене нылымше калыкле чемпионатын финалже тӱҥалеш. Тудо 8-ше октябрь марте шуйна. Таҥасымаш 70 регионысо верысе площадкылаште дистанций формат дене эрта. Шке профессионал моштымашыжым уло эл гыч 300 утла специалист ончыкта. Нунын заданийым шуктымыштым камера ден эксперт- влак эскерат. Марий Элыште кок компетенций дене моштымашыштым ончыктат: кермычым оптымаш да школ деч ончыч йочам шуарыме паша. Тиде сомылым республикысе чемпионатыште мартыште сеҥыше- влак ончыктат. Тиде- «Казанский посад» ушемын каменщикше Юрий Иванов ден Йошкар-Оласе 61-ше номеран «Теремок» йоча садын воспитательже Татьяна Кутюкова. Чемпионатын финалжым торжественно почмаш 6-шо октябрьыште онлайн-формат дене лиеш.
