Марий Элым вуйлатыше Александр Евстифеев Курык марий район администрацийым вуйлатыше Наталья Арганякова дене вашлийын
Курык марий районышто корным чоҥымаш да олмыктымаш ял озанлык сатум ыштен лукшо- влаклан логистике йодышым сайынрак виктарен колташ полша. Правительстве пӧртыштӧ Марий Элым вуйлатыше Александр Евстифеев район администрацийым вуйлатыше Наталья Арганякова дене вашлийын. Нуно районым социал-экономик велым вияҥдыме икмыняр йодышым каҥашеныт. Эн ончыч телылан топливым ситарыме да корным кучымо йодышым тарватеныт. Наталья Арганякован мутшо почеш, мланде шӱйым кондаш ойпидыш- влакым пеҥгыдемдыме, тудым арня еда конден шогат. Корным олмыктымо паша графикым ончылтен шукталтеш, пашан качествыжым верысе калык мокталтен ойла. Республикым вуйлатышылан фермер-влак кугу таум ойлат, манын. Пайыскырык да Микрак велыште ятыр ял озанлык производтель тырша. Нунылан продукцийым лукташ сай корно пеш кӱлешан. – каласен Наталья Арганякова. Правительство председательын икымше алмаштышыже Александр Сальников тыге ойлен: тачысе кечылан тенийлан палемдыме корно паша план шукталтын. Ешарен ойырымо 300 миллион теҥгем Курык марий районыш корным олмыкташ колтымо. Кызыт Юрино-Сумки паром сайын пашам ышта. Сумки деке корным ышташ проект да смета документацийым ямдылымаш график почеш шукталтеш, декабрьлан сай заключений лийшаш.- увертарен Александр Сальников. Республикым вуйлатыше тыгак районышто ял озанлык продукцийым аралыме верым ыштыме нерген йодышым луктын. Саскам перерабатыватлыман, консервироватлыман. Тыге талук мучкылан ситыше пашавер лиеш. Лач тыште мемнан задачына шога,- каласен Александр Евстифеев. Погынышо- влак тиддеч посна вӱдым ситарыме объектлан могайрак улмыштым да шушаш ийын корным олмыктымо план- влакым каҥашеныт.
