Марий Эл гыч ретротехнике Чебоксарыште кум кубокым сеҥен налын
Чебоксар олаште эртыше фестивальыште Марий Эл гыч ретротехнике кум кубокым сеҥен налын. Тушто авто-мото-ретро-техникым ончыктышо «Шӧртньӧ шыже» фестиваль эртен. Марий Элын командыжым У Торъял гыч палыме коллекционер Андрей Куклин вуйлатен. Мероприятий почеш кок кубокым Йошкар-Ола гыч налыныт. Андрей Васенёв Мерседесше дене «Постоянный участник» номинацийыште, Марат Закиров «Волга» автомобильже дене «Эн самырык участник» номинацийыште сеҥеныт. А Андрей Куклин «Мотоцикл» Эн сай реставраций» номинацийыште сеҥышыш лектын. Тудо Вермахт частьын 1941-ше ийыште лукмо мотоцикл-агрегатым ончыкташ намиен. Республикысе калык ретро-техникым, кубок дене палемдалтше- влакымат, 9-ше октябрьыште У Торъялысе тыныслык площадьыште ужын кертеш. Тушто ынде визымше гана «Торъял Фордзон» фестиваль лиеш, - увертара спорт-туризм министерстве. Организатор- влак коллекционер-шамычым ушнаш ӱжыт. Программыште ончер, интерактивный площадке, патыр- влакын модмышт, «Мӧҥгеш 90-шо ийлашке» концерт лиеш.
