Марий Элым вуйлатыше Александр Евстифеев корнын качествыжым пеҥгыдын терген шогаш кӱштен
Марий Элым вуйлатыше Александр Евстифеев корнын качествыжым пеҥгыдын терген шогаш кӱштен. Теҥгече тудо Йошкар-Оласе да Медведево районысо объектлаште чоҥымо да олмыктымо пашан кузе кайымыжым терген. Апшакбеляк ялыште илыме верым чоҥаш пуымо участкылаште чоҥалтше автомобиль корным ончымыж годым пашам шуктымо жапым тӱрыс эскераш йодын. Тиде кундемым вияҥдыме сомыл 2013-шо ий гыч шукталтеш. Икымше черетыште кок тӱжемат 300 утла участкым ойырымо. Тушечын тӱжемат 700 нарыже- шуко шочшан еш- влаклан. Коммуникацийым ышташ кӱлеш,- манын тудо. Микрорайон шым ий чоҥалтеш, а ончык кайымаш уке. Тымарте кокымшо-кумшо черет дене пашам ыштыман ыле. Тӱжемат 700 шуко шочшан еш тиде пашам шым ий вуча,- каласен республикым вуйлатыше. Апшакбелякыште кызыт 44 пӧрт гына илаш ямде. Тыгай чӱдылыкын ик амалже- корно, социал да инженер инфраструктурын укелыкше. Чоҥымаш министерстве ӱшандарен: идалык мучаш марте эше кок тӱжем квадрат метр илыме вер ямде лийшаш. Но Евстифеевын мутшо почеш, тыгай кугу микрорайонлан тиде шагал. Кызыт 60 миллион теҥгелан куд меҥге утла кужыт корным ыштыме, шушаш ийын эше куд меҥге утлам ыштен шуктышаш улыт. Тыгак газ пучым шупшыт, тул ден вӱдым пуртат. Республикым вуйлатыше тыгак Йошкар-Олаште корно ден тротуарым олмыктымо пашам терген. Тений ыштыме кокла гыч иктыже- Комсомол да Кремль урем ушнымаш. Комсомол уремым Ленин проспект деч Серов урем марте олмыктымо. Пашам сайын шуктымо манын палемдыме. Вуйлатыше тыгак Козьмодемьянск трактыште шуктымо пашам аклен. Тений тушто аварийность шагалемшаш. Шушаш ийланат тушто шуктышаш планым ыштыме. 800 миллион теҥге оксам ойыраш лийме. У ий гыч чыла процедура уэш тӱҥалшаш. Тичмаш налмаште «Лӱдыкшыдымӧ да сай качестван автомобиль корно- влак» проектыште шуктымо пашам республикым вуйлатыше сайлан шотлен.
